同男友上床果陣成日諗起個EX,點算好?

你好。件事係咁既,我同Ex 分手大概有1年,之後開始同而家男朋友拍拖,當然我地都有性生活第一次上床果陣唔知點解,我個腦出現Ex果樣,後來有兩三次都係咁。感覺好對唔住而家男朋友,好似自己唔係同緊佢做一樣。佢好似都察覺到我有啲唔妥覺得我唔專心。

我同前男友分手之前性生活上面的確好夾,並且佢係我第一次同第一個,除左佢之外,就同而家男友,所以性經驗我其實唔多。分手咁耐,我地都冇聯絡,我亦唔覺得自己對佢仲有感情,我都好鍾意而家男朋友。但係就係上床果陣會諗起佢。其實而家男友各方面都好好同我床上協調都好好一啲都唔比Ex差,我諗極都唔明點解會成日諗起Ex。

我最近都唔敢做好怕佢會發現呢件事。
我點做好?

匿名

 


網友你好,

其實你唔係第一個問我呢一個問題。阿A 同另一半做果陣會諗起中學師妹,阿B會諗起某個明星,阿C 會諗起一個唔太熟既同事,阿D 會諗起只見過一兩次的路人甲……佢地都有問過我,覺得好內疚對唔住眼前呢個人。

每個人都有佢地自己既性幻想對象。有時我們仲會刻意去諗無論係我地自慰果時,或者同另一半上床果陣,呢啲幻想令我地更快進入狀態,更容易達到高潮。大部分人都不會同另一半講“啱啱我幻想我同瑪麗蓮夢露做” 佢地會默默享受呢種快樂,不會覺得自責事實上都冇咩好自責。

仲有一部分人,同你一樣會因為呢種幻想而覺得自己背叛左眼前呢個人,因而感到好內疚。特別係你幻想既係同你有過感情既Ex。呢一種關係令你好似自己背叛左佢一樣。如果你已經確認自己對Ex已經冇感情而且分手一年都冇任何聯繫。所以,你既幻想並唔係因為感情而來。但好似不受你控制地存在,係咪?

事實上,性幻想有時就係不受控制。或者因為係你同前任性生活和諧愉快,你身體上設定左一個開關,當你想要Sex 時你會不自覺地諗起佢,就好似我地習慣卜訓覺之前要刷牙一樣係自然關聯反應。你話自己除左Ex 就冇其他性經驗,咁可能就係因為咁你將Ex 同 Sex 進行左唯一關聯。

我唔建議你而家將呢件事講比男朋友知,因為連你自己都未攪清楚發生咩事,咁樣傾落去只會造成誤會,影響你地感情。你不妨比自己多啲時間,等自己同男朋友多磨合,即便下次上床時又諗起Ex都輕鬆繼續享受床事,而唔係又將注意力放係:“咩事呀?!又諗起佢?”或者慢慢呢個幻想就會有一日係你腦入面消失而且會有新幻想取代佢。當你開始有了更多性幻想時,再同佢傾下可能會更好。

即便你有左更豐富性經驗,有更多不同既性幻想係唔係就一定唔會再諗起Ex呢?絕對唔係,同一個人有過性生活後幻想起來會更真更容易沉迷。可能好耐好耐之後,你都會間中幻想同Ex 上床既畫面,未必係你地一齊果時真實回憶,可能係你FF 出其它片段。但是希望你記住冇咩好自責,我們只係幻想唔代表真係出軌。

接受自己性幻想,Ex 係過去式你都唔再愛佢。放鬆自己心情,唔好因為緊張,焦慮,反而不斷糾結將單純幻想變成了一種強迫存在咁先最 worst。