我鍾意左一個有老公既女人,好掙扎!

你好,最近有件事情令我好煩,同身邊人都講唔出。我發現自己總係會愛上已有伴侶既人,有時候我一開始就知道她有另一半但我還是愛上,有時候我一開始並不不知道,但愛上先發現。

大學時我鍾意過一個師妹,認識時我唔知佢有男朋友到後來先發現,但是好似仲係鍾意佢,後來佢同男朋友分手我亦畢業,畢業時我才鼓起勇氣講出當年我鍾意佢,佢笑笑問我做咩唔早啲講。之後佢去左外國交流,我地分隔兩地都冇咩結果,之後就好似朋友咁,間唔中聯繫一下

畢業後,我又遇見一個女仔,我地係同事而且我早就知道佢結左婚,但係我同佢相處時我一啲都感覺唔到佢結左婚。私下相處佢好似一個小女孩,但面對工作時又好努力好用心。間唔中傾下計我諗已經做左朋友我都只係覺得佢好親切。

直到最近我地單獨出去食飯睇戲,我忍唔住錫左佢,而佢都冇拒絕,但係只要一諗到佢已經結左婚我又覺得好唔應該,覺得自己都係應該同佢繼續做朋友,但是已經錫左果啖就點收都收唔返但佢好似又唔抗拒我,我唔明白佢只想繼續做朋友定係想有進一步。其實我一啲都唔想破壞佢生活,果時我錫佢係因為果陣氣氛太好忍唔住。

我應該點做好?繼續落去,定係而家停?
我係咪心理變態?? 好苦惱。

匿名

 



Hello 年青人:

你話你啱啱畢業即係出黎社會做野冇耐,鍾意過既人應該5隻手指數得曬,咁快下定義話自己不斷做人第三者,係咪言之過早呢?將來你仲會遇到好多人,可能有單身,可能有的非單身。

再講,或者你真係鍾意已經有另一伴既女性,咁好有可能係佢地身上有某種共同特質吸引你。有人認為,有另一伴既女性通常會更理解男性心理,因為佢地都照顧緊另一個人,比未拍過拖拖既更能容忍一啲睇落好難忍既事(因為未拍過拖既女性會憧景一段完美既愛情,已經有伴侶既人更能接受現實)你所追求既可能係一份理解同包容?或者你可以諗下佢地有咩共同地方吸引你,而唔係諗因為佢地都有另一伴。
你需要確定既係,當你鍾意呢個人既時候,無論佢有沒有另一半,你都鍾意,有另一半絕對需要減分,因為你在追佢既過程要不斷掙扎,思考,付出更多。其實,你唔需要太擔心自己沉迷有伴侶既果個女同事。只係咁啱比你遇到呢個情況可能下一個會係單身呢。如果佢係拍緊拖都可以大方表示,畢竟選擇權都係個女仔手。但如果結左婚,就建議抽身而退。

但係如果你發現你係因為知佢有另一半時有一種奇怪既征服感係你身上,好似係到升level 打機令自己更興奮,咁你應該反思,呢啲係咪愛情?定係只係想證明自己?如果你已經到左覺得自己一定要“拆散佢地”既程度,我諗你應該要睇專業的心理醫生。

但從你來信睇到,大學鍾意果個女仔,你又一直等到她單身先講出之前鍾意過佢,所以你應該唔係為左尋求刺激既…

咁我地要講下而家個人妻。忘記果個Kiss,佢可能同你一樣只係覺得氣氛好,你係身邊咪Kiss。果一瞬間荷爾蒙冇任何思考,之後冷靜左你同佢都會諗到屋企果個人。如果你都冇好深既感情就要趁早抽身免得三敗俱傷,而家咁仲可以做朋友。

如果你真係覺得自己好鍾意佢。可以先進行理智溝通,咁樣之後你會知道你下一步係咩,例如傾下佢既家庭如何?佢同佢老公係點相處?佢會唔會,拋棄而家有既生活選擇你?大家都要先思考後覺決定,之後再大方交往或斷絕往來。你也唔想佢係你同另一個人之間周旋啦。

願你能為自己每個決定承擔責任。
祝福你