[長文] 18+ Central 被家長投訴 民智大倒退?

最近鬧得滿城風雨既話題,莫過於「有家長投訴成人展」、「市民投訴成人台AV太真實」。「家長」/「市民」點黎,大家無從得知。但最起碼,我地可以分析下到底點解變成咁,有個反面教材,提高自己學術修養,唔好變成世界笑話嘛。

 

成人展由來

講成人展之前,係香港其實歷史耐少少既當然係成人台(唔計紙媒),而成人台賣咩野,唔洗講都知有咩睇,做得收費台,每家電視台都會提供一系列既保安系統,例如lock 台password,只限比左錢果位人士知黎開返節目睇,防止返屋企18歲以下既人士/唔想睇既人士誤開。當然,撞中密碼開得到,與人無關,可能想睇掛。

 

而成人展原先就係美國/日本等有成人電影業/產品既大國主力發展既,由2004年起,成人展到上海開展,講既唔止係色情野、商業野,係有相關既成人保健教育,例如點樣/點解用套、疾病防治、健康展覽/講座等,主力係為推廣性健康,減低由性感染疾病既數目(當然,中國咁大,要做有排做),一路都好成功。之後2014年後就去左澳門,做既都係相關主題,反應都好好,所以展覽商話因為聽到香港人有好多都唔想成日咁辛苦過大海睇,於是就黎左香港搞,順手試水溫。但點解到左香港,仲要只係第一次搞公眾展覽,就樣已經搞成咁呢?

法例不合時宜?

涼子唔係律師,無辦法好專業咁分析,純粹拎出可以投訴得入既法例黎睇。

先睇睇香港法例第390章 《淫褻及不雅物品管制條例》其中一條講拎牌展示色情野的條款:

23. 禁止展示不雅事物

(1)

凡有公開展示的不雅事物,則作該項展示的人,或任何導致或准許作該項展示的人,不論是否知道該事物是不雅事物,均屬犯罪,首次定罪,可處罰款$400,000及監禁12個月,第二次或其後定罪,可處罰款$800,000及監禁12個月。

(由1995年第73號第7條修訂)

(2)

本條不適用於 ——

(a)

在根據《廣播條例》(第562章)領有牌照的公司所提供的電視節目服務中出現的事物;或

(由2000年第48號第44條代替)

(b)

在真正美術館或博物館內進行而只能從該美術館或博物館內看見的物品展示中出現的事物。

[比照 1981 c. 42 s. 1 U.K.]

 

前題係,攞正牌展示既機構係法例監管下禁止向18歲以下人士發佈或展示,如果唔係18歲以上,又比左入場費,又點會睇到成人台/成人展呢?然而,係香港法例下,18歲以上人士係定義為有精神(智力正常,精神狀態正常)為自己行為作決定(包括法律責任)的人士,所謂家長投訴,從何而來?的確,養兒一百歲,長憂九十九,但18歲既成年人,要睇成人台/成人展,可唔可以因為個仔/女睇,身為家長覺得呢D內容唔適合佢地睇而去告人呢?從法例上,睇唔到,亦睇唔到大會/成人台有咩錯。「無理」指控,政府受理,終演成國際笑話,如果作為一個國際大都會,要同世界接軌,首先必定要擴闊視野,而非做井底之蛙,見到認為唔好睇既唔合心水既就BAM!

 

不過,正正因為淫審條例都寫左好多年,存在好多灰色地帶,只要係「令人不安」/「有理由支持會令人感到不安」,理得你係咪成人展/色色Art,一律馬賽克/包膠。正如投訴成人台咁,因為套AV拍得太真實,「令人不安」,「覺得會有人有樣學樣」,所以投訴理由成立。

 

再加上,去成人展當然係去睇下肌肉猛男/AV女優既表演,但問題係,又係法例灰色地帶:

 

香港法例第200章 《刑事罪行條例》 第148條「在公眾地方的猥褻行為」,任何人在公眾地方暴露性器官,或作性行為,有機會觸犯猥褻暴露身體的罪行。若無合法權限或辯解,在公眾地方或公眾可見的情況下,猥褻暴露其身體任何部分,即屬犯罪,一經定罪,可處罰款$1,000及監禁6個月。

 

展覽,本身可以話係私人地方,但因為有街客入場,而且用既地方都係同政府租借出黎,對比之下,成件事變左係「公眾場所」。只要有性器官既公仔/道具,不理因由,只跟據呢個思維,仲唔係「露械」、影響市容?!

呢個,就係係香港搞成人展/成人台播AV會落得投訴既下場。

 

撰:毒菇涼子