痕痕痕……其實佢可能只係……

「索女扯裙猛咁搲」
http://hkgalden.com/view/314833
 (抽水源)

酵母菌感染,有少少坐立不安咁囉。

有啲女仔不時會覺得陰部痕癢(唔好諗錯隔籬,係真係覺得痕,要搲嗰種),外陰蒙上一層白色分泌物,跟住好緊張,以爲自己染上性病,又或者唔知點處理。其實酵母菌感染喺女性之間好常見,主要原因係用藥或洗滌引致陰道內微生態失衡,酵母菌增生引起感染。

初發嘅感染通常可以透過改變習慣嚟治療,主要原理係避免製造酵母菌滋生嘅環境 —— 甜同濕暖。戒甜食、穿着鬆身內褲同衣物都係基本;另外,保持陰道微生態平衡都不可或缺:食乳酪吸收多啲益生菌、避免用過份鹼性嘅物質清洗陰部,仲要增強免疫、避免心情緊張同過份壓力。如果情況持續,就當然唔好怕醜,乖乖地去睇醫生啦!

唔好以爲淨係女仔先要了解酵母菌感染,伴侶嘅理解同配合都好緊要!好多男仔缺乏健康知識或者同理心,以爲女伴污糟邋遢染病,甚至出言揶揄,即是只係講笑,都可能令本身已經好困擾嘅女仔覺得不受尊重,或者更加羞恥,如果因爲咁而影響感情或者延誤治療就無謂啦!如果男朋友提醒女朋友戒甜、幫手買乳酪,又願意暫停性行爲促進康復,相信女仔都會覺得好溫暖貼心!

撰文:一起拉丁舞

#若要生活好