「第一次」家長談性大法 “a special dance”

好多家長一講起性教育就頭都大埋,到底應該主動講,定係被動答?應該單人匹馬,定係雙親同場?呢條片就記錄咗一啲父母同仔女初次談性嘅場面嘞,啲細路嘅反應都幾純真可愛㗎!

我自己就覺得性教育同其他教育一樣,都應該循序漸進,逐步教識小朋友一啲基本概念,唔好一下子就將太複雜嘅野灌輸畀佢哋,否則佢哋好難接受同諗得通,就容易採取逃避或者訕笑嘅態度。可以學下片入面一位爸爸咁,適當嘅時候利用下修辭手法,第一次講嘅時候將性行爲嘅詳情比喻爲「a special dance」,等小朋友明白個大概,以後再慢慢講解,都不失爲一個好方法。

同一時間,大家都應該觀察到,有啲小朋友會覺得尷尬、噁心,甚至揞住耳仔大叫唔聽!如果仔女反應好大,其實可能代表佢哋仲未準備好接受爸爸媽媽想表達嘅特定訊息(例如性行爲),咁我覺得家長都應該尊重佢哋意願,暫時擱置話題;但咁並唔代表要完全唔講嘅,可以換個角度講啲無咁hardcore嘅野囉,畢竟性教育有好多層面,唔係下下都要急住講性交嘅。

最後都想提提大家,應該教識小朋友,即使性教育嘅內容係好正常嘅事,但性器官、性行爲等等始終係私人嘅,請佢哋唔好得意洋洋咁喺學校周圍講,咁既可以教識佢哋性嘅意義同埋提醒佢哋尊重別人,又可以避免佢哋講多錯多,或者同學校或者其他家長嘅性教育計劃衝突,引起不必要嘅不安同麻煩。

你覺得最好嘅性教育係幾時做、點樣做?各位家長又有咩搞笑時刻或者性教育心得可以同大家分享下呢?快啲留言話畀大家知!

p.s. 嗰兩個亞洲/混血細路超醒超精靈呀!勁鍾意(心心眼)

水源:https://www.youtube.com/watch?v=a3MyLt6l5n0
文:一起拉丁舞