[有樓有高潮] 其實女仔所謂拜金,都只係想計劃生育姐……

新年前後,筆者嘅面書上幾乎日日都有朋友求婚成功嘅post,或者係婚紗相,我忍唔住諗:佢地結左婚住邊呢?

香港樓貴就係人都知,不過筆者嘅朋友大部份都唔係工作左好耐,除非一年365日,唔玩唔出街唔食,佢地應該都未儲夠錢俾首期。租?又唔捱得幾耐。最後方法,就係同其中一方父母住住先,儲夠錢先搬出去。問題來啦:萬一同對方父母火星撞地球,我咪GG?

婆媳、爺夫糾紛就不在話下,日常生活習慣唔夾,食完飯要唔要即時洗碗,都可以嗌交。如果係奉子成婚呢?可能淨係個B 要點樣湊,俾邊個湊,都已經可以第三四五六次世界大戰!正所謂手心又係肉,手背又係肉,除非你有父幹,即時上車,如果唔係,筆者真係想像唔到新婚之後會有幾幸福。

想有樓就先要有錢,要有錢就先要入搵到錢嘅行業,要入到行就首先要努力過人……其實香港女仔成日俾人話拜金,眼角高又要求多多,有樓先有高潮,佢地都係想到第時結左婚,有兩口子嘅私人空間,慢慢組織下小家庭姐。如果係結婚前呢堆問題都未解決,筆者真係奉勸你,停一停,諗一諗,唔好衝動,搞到家變。

文:男校女主筆