很想要但老公唔想要,點算好?

話說有晚涼子睇電視既時候,有個嘉賓就話佢有個女性朋友無同老公行埋一段日子,佢就慾火焚身,佢老公就成日都無動於衷,搞到佢想叫鴨(召男妓)。咁係咪有性需要就要搵人解決呢?就住呢個問題,涼子想解決左生理需要先….(茶)(喂呀咪諗其他野,雖然涼子成日少少咸多多脆)

女人咩時候會慾火焚身?

人既生理結構呢就好得意既,男人諗/睇咸野,會扯旗,丁仔會流口水(前列腺液),好熱好想搞,其實女人都一樣。女人想要,下面會濕,呢種濕同一般分泌唔同,質地同排卵期既分泌好似,會透明又拉絲咁,摸落滑身,但唔同在於,好快好似蒸發左咁。呢種分泌物叫做陰道分泌(Arousal fluid),方便之後既「運動」;而平時透明拉絲果種係叫宮頸分泌(Cervical fluid),佢係方便呀精向上游同卵子kiss。女性係排卵期前後,M完後果幾日會好想搞野,原因係要比女性知道,呢段時間,生育力係最好,近乎一擊即中!相反,如果身體處於不孕期既時候,分泌會少,會感覺乾,變相唔歡迎呀精向上游,性慾都唔會咁強。當女性身體成熟,生育能力最強,即大約27-35歲,性慾會愈黎愈強,直到更年期前,身體都會提示女性及早懷孕🤰。

 

如果想了解多d,可以睇呢個網,英國NHS(當然英文啦,中文真係搵唔到咁詳細):https://www.nhs.uk/Livewell/Goodsex/Pages/Sexualarousalinwomen.aspx

 

男人唔係幾時都可以執返劑咩?

呢個問題,好多姊妹都有困惑,其實男人同我地一樣,有時候都會唔想。男性有時未必係有關性功能障礙,泌尿問題,又或者出軌,主要係因為性慾(Libido)不足,由工作壓力,疾病,甚至係兩性關係引致,有成15-16%咁多既人受佢困擾。(參考:Loss libido of men: https://www.webmd.com/sex-relationships/features/loss-of-libido-in-men )講白點,姐係面子問題。係華人社會,父權為主,男性自然係有照顧家庭既責任,即使男女平等,男性都係主力受社教化影響,要強勢,擔起頭家,要養妻活兒乜乜乜。搞到男人係兩性關係中總會要好強,大戰幾多回合,幾多分鐘先派貨都好緊要,令到自己女人叫聲連連更有滿足感。但人唔係成日都咁勇猛嘛,你數得出既都係一個原因令到男人無哂性趣。其實,比著女人都會喇,所以,有時作為伴侶,大家互相體諒,呢d野搬出黎講,大家既身體又唔係無見過,唔洗怕羞,好過收收埋埋搞到家變啦。

 

咩叫Libido,可參考涼子早排post既呢條link:

*佛洛依德:精神分析學派 (p.35-41): http://www.eyebook.com.tw/books/2BF27/2BF27-CON.pdf

 

叫鴨可解決女性性需要?

涼子想講,叫咩都解決唔到空虛寂寞凍!其實呢單野講白點個女既只想老公注意,係叫一早叫左!你係愛對方就唔會肉體出哂軌啦~

 

肉體上既慾望其實好易解決,用手用玩具甚至借老公條野坐都得(佢性起更好啦),唯獨叫鴨一定唔讚成!相反其實我地要諗既係到底性同愛係點定位?涼子立場係,安全性行為,同一個(性)伴侶,就算SP都要尊重對方啦,何況係自己老公呢?掉轉個老公走叫雞老婆實又話離婚又好污穢,將心比己啦。

 

咁點令老公有返性趣?

首先,當然同老公傾下佢最近有咩擔心啦,身體有咩唔舒服等等,兩公婆,根本咩都要開心見誠講既,要比佢知做老婆係係佢身邊支持佢,返到屋企係一個舒服既休息地方。當然佢可以唔講既,但表明你會一直擔心佢,比佢知你一直緊佢既。其次,了解老公口味都好緊要,老公鍾意睇咩AV,著咩野玩咩野佢會開心,學下人地既技巧。唔好以為男人先會搞D浪漫氣氛,女仔有時主動D當搞搞新意思,傾好咩時間佢會無咁忙,就果陣好準備自己,扮靚D,世上無醜女人,只有懶女人!就算生完BB,做呀媽都可以肥得黎可愛,就當獎下自己平日咁辛苦都好!你地老公口味係點,涼子唔會講得到教得到,但按下摩搞下氣氛之後有下文既,相信有經驗既姊妹知點做既!女生都可以有主導權,唔一定等個男人黎,因為性係平等,生出基本上就會識。(提返,唔想搞出人命記得要安全措施做到足呀!)

 

撰:毒菇涼子

Leave a Reply

Your email address will not be published. Required fields are marked *