俾耶穌帶綠帽?

早幾日有新聞報導關於教會女校用「萬年」安全套教學,生物堂上教師只係攞教學用嘅過期安全套示範,筆者表示,你有得見到個套咪算好囉,性教育呢家野真係天外有天。

筆者入男校前,係讀傳統教會女校。同樣都係教會女校,校方就搵左個牧師來講貞潔運動,鼓勵我地買貞潔指環。貞潔指環嘅意思係:因聖靈的感動與光照,願意立志重新與基督連結,作貞潔的童女等候基督。人話為:因為我信教,所以我願意嫁俾耶穌,一日未結婚,我一日都唔會做愛,絕對唔會有婚前非配偶性行為。

筆者細個聽嘅時候都覺得好神聖,部份同學認為痴X線。我宜家先明,帶上貞潔指環,即係你預備帶耶穌綠帽:你又要嫁俾耶穌,佢又同唔到你啪啪啪(神交?),但你日後又要同第二個世人結婚,係咪明玩佢先!除非你非耶穌不嫁啦。教徒肯定會話:我配偶係耶穌鍚俾我架!咁我反問:你同你伴侶講,你已經嫁左俾耶穌,為免重婚,不如唔好結婚?

「禮物理論」係教會論述入面唔係新野,一講到戀愛及性話題,啲青少年導師就會同你講:性就好似一份禮物,應該包到靚靚咁送俾人,如果提前有性行為,你就一份已經俾人拆左嘅禮物,收到個個見到已經拆左,都唔會開心啦!筆者真係諗極都唔明,送得份禮物俾人,就係想人鐘意入面份真•禮物,仲留返個包裝紙同個盒來做咩?你咪又係掉左佢?(黑人問號)

筆者仲記得個牧師嘅貞潔邏輯:如果唔想發生意外,就唔好俾自己跌入引誘;如果擁抱係引誘,就唔好擁抱;如果錫錫係引誘,就唔好錫錫;如果拖手係引誘,就唔好拖手……嗱!唔係唔俾你拍拖,不過就唔好有引誘囉!

全港一共有千幾間中小學,呢位牧師已經去左近200間教會學校傳揚佢嘅福音。筆者宜家終於都明,「老師冇性經驗點性教育」並唔係指責老師,錯唔在於老師,呢個係社會嘅錯,時代嘅錯,教育嘅錯。

來源:教會女校用「萬年」安全套教學貞潔指環

文:男校女主筆