古有埋兒奉母 今有日母棄嬰

近日有單新聞,令筆者個心都離一離,就係一名日本女子由於家貧,冇錢養仔,係過去廿幾年來遺棄四個親生BB嘅屍體,然後放入裝滿混凝土嘅水桶內,長伴自己身邊。

筆者除左覺得背後有一陣寒氣,仲鄧佢心痛。本版已經講左好多次生育計劃有幾重要,但萬一出意外,有邊個想親手殺左自己十月懷胎嘅骨肉,仲要將屍體放係水桶裡面,扮係混凝土,然後當冇事發生過咁,繼續日常生活?

筆者有個中同,佢媽媽為左生男丁,人工流產左兩三次,結果佢落完胎個排晚晚都夢見死去嘅BB,搞到日日喊,好大壓力,又睇醫生食藥,求神拜佛,咩都做齊,先至安心少少。筆者真係好難想像個日本媽媽每晚點瞓覺,或者每次見到屋企個四個水桶會幾崩潰。

中國《二十四孝》裡面,有個故事叫「埋兒奉母」,漢朝郭巨家境貧困,郭巨阿媽為左養大孫仔,節衣縮食。於是郭巨打算埋左個仔,因為個仔分薄左阿媽嘅糧食,佢認為仔可以再生,但阿媽就得一個,死左就冇。雖然最後郭巨冇埋到個仔,仲有奇蹟發生,但唔少人認為呢種「孝心」真係好毒。不過呢個故事亦都教訓我,養唔到就唔好生,生得出來就要負責。只係到幾千年後,現代人都仲係重複犯錯。

新聞來源:http://news.now.com/home/international/player?newsId=243974
文:男校女主筆 2017/11/23