外射當避左孕 做愛心存僥倖?

今日香港報紙出左一篇專訪,訪問一名前社工覺得香港性教育失敗,做前線工作睇到好多深刻個案,而轉行開性商店,俾人知道性係可以快樂地講。

筆者好佩服前社工嘅開放態度,唔用責備口吻去同已經衰左嘅人,相反,單刀直入,直接問佢地係點樣避孕,咁先可以糾正返一直以來錯誤嘅避孕概念:其實咪又係外射扮冇事,內射靠僥倖。

筆者留意到一年前該報版都過一篇類似嘅訪問,係一位少女17歲就第一次意外懷孕做媽媽,因為家庭、學校性教育不足,一直以為拍拖同性係兩樣野,直到佢俾當時嘅男友中出左,都唔識即刻搵事後避孕丸,最後中獎,生左出來要俾寄養家庭。

體外射精根本唔係一個「避孕」方法,就算男性真係可以外射,仍有懷孕嘅可能性。因為男性係性興奮時,體內尿道球腺會先製造少量透明分泌由尿道排出,呢類分泌內含精子,係充分足以令女性懷孕。就算冇中出,如果陰莖曾接觸陰道或陰部,一樣有機會導致懷孕。

一年前同一年後,外射當避孕都仲係主流觀念,筆者真係好擔心,今個聖誕節唔知又會有幾多個新家庭準備成立。

專訪來源:【前社工讀白】轉行開性商店 因性教育失敗:有少女墮胎近10次做愛≠懷孕?17歲媽媽親歷性教育:佢喺入面射咗,但冇諗過避孕

文:男校女主筆