[學術台] 進擊的精子:同女友浸浴會不會有BB?

話說近日係cosplay界有幅whatsapp cap圖就話有個男仔環保地將個套用完一邊用另一邊,令女方懷孕。關於用套呢樣野,涼子同其他writers都講到出牙血,唔講啦。重點係,原來好多人唔知勇猛既「孝子賢孫」—精子可以生存幾耐,以前中學書本話係空氣底下幾分鐘會瓜哂,係真唔係?咁涼子就會係以下落黎介紹下呀精既存活條件!

  1. 溫度

精子生存既溫度只係比人體核心溫度(攝氏37度)低1-2度。有研究講過,鐘意浸浴、著緊身褲、旅行浸下溫泉、長期坐既男性,佢地既精子活躍度都比其他人慢,主要係外間環境影響蛋蛋(睪丸)內既溫度升高引起。最嚴重,如果蛋內溫度去到39度,如發高燒、進行高溫活動如浸溫泉太耐,足以影響整個精子工廠既生產過程,可以引致不育。

 

台灣有個研究講溫度對精子既影響,同埋改善生活習慣後既精子質素,巴打們可以一睇:https://www.e-stork.com.tw/article/view/4438

 

  1. 酸鹼值(pH)

一般而言,精液既酸鹼值為7.2-8,只係少少偏鹼,接近中和值,同人體體液既酸鹼值近乎一樣。太酸/鹼除左係殺精之外(秒殺!),對人體都有害,引起燒傷/癌症。

 

  1. 體外vs體內生存時間

首先,係男性身體入面可以生存大約74日,每次生產新既一批精子時間要上兩至三個星期。

而係女性體內,就要視乎返係咪可孕期。可孕期既體液酸鹼值都同精液相似,可以提供一定既營養比精子,重點係,夠滑身。可以想像到,精子踩住滑板向卵子進攻既樣,嗯,24-72個鐘內可以搞出人命。

 

如果巴打「射落海都唔益人」既時候,就視乎射係邊。

射係乾燥既地方,例如紙巾、衫褲等既地方,基本上因為吸收左精液既關係,加上係空氣底下精子會減少左活動能力,精子就會堆埋一齊,變成乾屍,需時只不過係20-60分鐘內既事。

射係濕潤既地方,可以想像,點都保持到一陣既(要睇巴打有幾健康,勁既半個鐘都得!),但係,如果係含有化學劑既地方,幾秒即瓜!

 

可能有巴打關心,如果同女友浸下浴,呢個中招機會率高唔高?其實,暖水介乎精子活躍適當溫度32-36左右,機會唔細,當然要視乎返女友係咪可孕期同水入面有無沖涼液之類既化學野。嗯,都係果句,唔賭唔知身體好,唔想有BB住既話係博唔過。

 

不過,例如體外射精,係好接近女性生殖器官既話(如陰部附近),唔好睇少精子,佢地會戰至死亡既到來!!!(生存幾耐?上面官方答案)所以,都係唔好博一博,單車係會變摩托!(未計生插既時候前列腺液係有營養,同精液係同一類野,當中總會漏幾條精子)

 

  1. 女性體內如何生存

要強調一下,女性既可孕期有成一個星期長,當中既體液涼子之前既文章都有介紹,因為係由宮頸分泌出黎,滑板既速度,有營養都唔係最驚,有人話呀精可以係女性體內生存2-3日,呢樣係真架!!原因係因為呢D體液好似個網咁,比精子自由進出,配合返成個女性生殖器宮(宮頸、子宮壁、輸卵管)既手指狀組織,完全係呀精既溫柔鄉!住住先,住到可愛既卵子既出現再進攻!

 

唔好以為不孕期唔會懷孕,始終精液係有營養,係幫助精子存活既功臣!係濕潤環境又有營養之下,24-72個鐘係壯健既精子眼中係無問題,如果咁好彩第二日就係可孕期,就要講定恭喜先。

 

點保持精子健康?

一般而言,出擊左一輪既精子,蛋蛋內都會有一定數量係度,當然唔好去完一次又一次,每次一茶匙既量唔少野,傷身架。要保持住精子既質素,就要等兩三日新返既精子軍團。平日食多D肉類,提供多D蛋白質吸收,特別得閒就食下生蠔,當中既鋅係精子健康既必須品。少D令蛋蛋太高溫,放鬆下下半身既約束,呀精一定好感謝你!

 

食煙、飲酒,傷身又傷精,有咁既習慣,為左精子健康,巴打們就食少D啦!另外,如果有巴打係工作上會多接觸蝠射、化學品等等,咁就要小心,唔止係影響健康咁簡單,整個生殖能力,精子活躍同完整性都好有影響,建議巴打定期驗身保障自己!

 

下面有則新聞,巴打們可以參考下:https://topick.hket.com/article/1991308/丈夫精子游得慢%E3%80%80跟營養師食「養精」餐單

 

撰:毒菇涼子