【AV Q&A】AV女優有銀用?行情探究(二)

上回講到拍AV嘅片酬,好似唔錯咁,但係AV行業因爲網上免費鹹片流通而大大萎縮,主要市場基本上只係剩返仍然買碟嘅大叔,而呢個市場又明顯會越嚟越細,片商掙扎求存,爲咗減省製作費,都會偷工減料,以減少「本番」(打真軍)次數嚟同女優講價,片酬可能大降一半,甚至得返三幾萬。更加唔好講,呢種供過於求嘅市道之下,女優根本就唔係日日有工開。最近有一篇社會學文章提到,「日本社會恐怕將迎向,人類史上首次年輕女性想出賣肉體卻賣不出去的時代」,我好相信AV業正正就係見證緊呢個時代。 上次講緊嘅日本AV產業系列文章,都提到一啲女優嘅生活慘況。由於片酬越嚟越少,而且多達50-70%要分畀事務所、經理人,竟然有業界排名前15%嘅企劃單體女優要喺「貧窮極限」生活,以15至20萬日圓(約10,600至14,100港元)、幾乎同兼職看護睇齊嘅月入,竭力維持外表同尊嚴,每個月用五六萬日圓(約3,500至4,200港元)置裝(只係二手衫)、做頭髮、整指甲,但就要住冇浴室嘅爛屋,停水停電停電話不特止,連飯都食唔起。呢個月入數字,換算成年收入就係200萬日圓(約14萬港元)左右,但睇返資料,做寫字樓清潔,平均年薪都有234.7萬(約16.6萬港元),收銀就唔夠250萬(約17.6萬港元),咁其實做個正正常常、唔算大紅大紫嘅AV女優,都唔係好好搵㗎咋喎。我哋成日鍾意話日本AV從業員唔係好受歧視,好似其他明星咁可以大搖大擺出街,但講到尾,賺錢都係最緊要。AV業全盛時期嘅風光不再,大家睇到嘅富貴榮華、fan屎滿堂,都只係最紅最紅嗰幾個survivor嘅表象,其他喺裸海載浮載沉嗰幾千人,有啲其實可能苦過dee dee,你都咪話唔慘。 文:一起拉丁舞   【日本AV產業崩壞】海外「無碼片」流竄 女優收入少全盛期85%(https://www.mirrormedia.mg/story/20171020int002/) 王向華、邱愷欣《日本AV女優:女性的物化與默化》 【日本AV產業崩壞】住沒浴室的破公寓 女優貧困超乎想像(https://www.mirrormedia.mg/story/20171020int001/) 日本社會恐怕將迎向,人類史上首次年輕女性想出賣肉體卻賣不出去的時代(https://www.thenewslens.com/article/84123) Average Annual Salary by Occupation, in Japan, 2014(http://nbakki.hatenablog.com/entry/Annual_Salary_by_Occupation)

Read more

【AV Q&A】拍咸片搵快錢?行情探究(一)

AV Q&A 一直都係我哋嘅重點主題,所以小妹遇到同色情電影行業有關嘅文章都絕對唔會放過。我最近就見到幾篇以「AV產業崩壞」爲主題嘅文章,又睇緊一本實地研究日本AV女優嘅社會科學文集,可以幫大家總結下近年女優界嘅行情。 要知道女優賺幾多錢,首先要知道女優嘅分類 —— 「單體」、「企劃單體」同「企劃」女優,簡單嚟講,以上正好係以片酬遞減排序。 – 單體女優通常特別樣靚身材正,專屬特定片商,以偶像手法包裝,獨立演出齋賣色相、唔使劇情嘅AV,演出費可以過百萬日圓(即超過七萬港元),一啲由藝人轉爲AV女優嘅靚女,更曾經以千萬片酬製造話題。 – 企劃單體女優冇同特定片商簽約,可以接拍任何片商嘅AV。呢啲女優雖然都靚,但通常未去到偶像級,所以需要加入唔同AV主題或劇情去吸引觀眾。佢哋一日酬勞係 25至40萬日圓(約1.7至2.8萬港元),片商好多時捉緊機會大拍特拍,薄利多銷,唔少比較知名嘅女優都係咁樣出頭。 – 企劃女優通常姿色平平,幾個一齊演出一部AV,有時唔出真名,簡單以「素人」身份出現,甚至面部打格仔演出,正常片酬係十零萬(即港幣萬幾蚊)左右。呢啲片通常着重故事構想,女優反而唔係主角。 好可惜,以上嘅金額只係理想檯面叫價,真正行情同女優慘況留待下回分解。 文:一起拉丁舞 參考資料: 【日本AV產業崩壞】海外「無碼片」流竄 女優收入少全盛期85%(https://www.mirrormedia.mg/story/20171020int002/) 王向華、邱愷欣《日本AV女優:女性的物化與默化》 【日本AV產業崩壞】住沒浴室的破公寓 女優貧困超乎想像(https://www.mirrormedia.mg/story/20171020int001/)

Read more