泰國家庭大旅行 精液黐屁股:算唔算強姦?

日前睇到篇新聞,竟然係關於已婚嘅26歲堂舅父,涉嫌係家庭大旅行遊泰國嘅時候,非禮及強姦正值月事嘅15歲女事主。【案件編號:HCCC138/17】(新聞來源: https://m.mingpao.com/pns/dailynews/web_tc/article/20171011/s00002/1507659214619)

雖然女事主表示佢曾經反抗話「唔好再搞啦」,但係堂舅父仍然「霸王硬上弓」,仲郁左大約15秒,並發現屁股上有「黐黐立立」又溫暖嘅液體(諗起都驚)。由於感事態嚴重,女事主父母已決定即時報警,可疑其他親友阻止,只係舉行左家庭會議。

根據香港《刑事罪行條例》(香港法例第200章)第118(3)條列明,如任何男子「(a)與一名女子非法性交,而性交時該女子對此並不同意;及(b)當時他知道該女子並不同意性交,或罔顧該女子是否對此同意」,便干犯強姦罪,最高刑罰是終身監禁。不過強姦係*必須*包括陰莖插入陰道。只要陰莖插入陰道少少,即使冇射精完成性交,亦足以構成強姦罪;但如果陰莖並非插入受害人嘅陰道,而係進入身體其他部位,例如口腔或肛門,就唔能夠構成強姦罪。同時,如果插入受害人陰道嘅並唔係陰莖,而係其他物件或其他身體部位(例如手),亦唔夠落強姦罪,最多係非禮罪(猥褻侵犯罪)。

雖然事後堂舅父曾發WhatsApp俾女事主道歉,但筆者認為,如果你係個個女仔,遇到強姦、非禮,或其他性暴力事情發生係自己身上,可以參考以下建議:

1. 即刻話俾信任嘅人聽:雖然當時你情緒應該好波動,根本唔知發生左咩事,但首先要搵你信得過嘅人,包括家人,朋友及老師,千祈唔好覺得「第一次發生,好想快啲過咗去」就算。

2. 聆聽自己心聲,千祈唔好怪自己:有d所謂「專業人士」聽你講完,可能會覺得你多一事不如少一事,尤其涉及到熟人,更加唔好報警,以免人地講三講四。甚至會有人將個責任推係你度,問你個時「係唔係唔檢點」,「著得太性感」等等,但你明明就知道自己冇做錯,自己亦冇同意該次性行為,咁就應該報警,或者尋求協助。

3. 去診所檢查:如果你曾經掙扎過,或身體上仲有對方的皮屑或分泌物,應該要即刻去醫院,或者搵醫生做檢查,留返個record,確保你有證據證明有冇發生插入式性行為,或者係其他性暴力行為。

4. 報警唔怕遲,一定要堅持:正如呢篇新聞的日期,係尋日嘅新聞,但奸案件發生係上年農曆年!而且仲繼續審緊!你就想像到司法制度都係要時間的。其間,可能有唔少人,甚至係警方,會多次搵你問話,仲係唔係想上庭呀之類,仲可能會無心之失咁批評你「做乜咁耐先報警」,令你覺得好攰。不過千祈唔好放棄!一日你知道你係受害人,一日你都要為自己平反!。

5. 喊,盡情喊,但唔好自虐:情緒係需要發洩出來,千祈唔好收收埋埋。如果你怕自己做傻事,就搵朋友二十四小時同你一齊,睇實自己。

6. 如果你身邊冇人幫到你,或者你信唔過家人朋友會唔會周圍同人講,你可以同我地網頁或 Facebook 聯絡:

私信我地「隨心問性」:https://www.facebook.com/elife.edu/
易生活發問:https://elife-edu.org/%E6%98%93%E7%94%9F%E6%B4%BB%E7%99%BC%E5%95%8F%E6%80%A7%E6%84%9Bqna/

亦可以去政府及非政府機構嘅支援服務,呢度有幾個機構參考:

社會福利署:http://www.swd.gov.hk/vs/chinese/welfare.html
東華三院芷若園支援性暴力受害人服務:http://18281.tungwahcsd.org
風雨蘭熱線:http://www.rainlily.org.hk/rainlily/%E9%A2%A8%E9%9B%A8%E8%98%AD%E7%86%B1%E7%B7%9A/

7. 最後提醒:無論係因酒精、藥物或其他物質,而自願地致使自己神智迷糊,都係唔能夠成為強姦罪嘅抗辯理由。如果男方明知女方唔同意,或者罔顧女方係唔係同意,而仍然同女方性交,即係女方係「冇同意」到,咁就算係強姦。

資料來源:社區法網http://www.clic.org.hk/tc/topics/sexual_offences/all.shtml