[又到聖誕] 你係邊個節日嘅產物?

踏入十一月,筆者已經見到維港兩岸已經亮起聖誕燈飾,商場已經擺左聖誕大紅花添!呢個時候又提醒筆者,又到左授孕高峰期——聖誕節!之前本版出過一篇「授孕方法有好多」,不如今次就來講下避孕呢?

 

近代嘅生育控制法包括屏障法、賀爾蒙類避孕措施、子宮內避孕器、結紮、以及性行為控制法。不過,相傳早係3000年前,古印度同古埃及人係用鱷魚、大象嘅屎作為避孕藥嘅配方!嘩,啲藥臭到連「食慾」都冇埋,成功避孕,仲避埋性!可能係你執到鱷魚屎之前,你連條命都冇左啦。

 

可惜唔係個個時期,人人都會避孕,或者控制生育。二戰後,係大戰後人口勞力下降,加上重男輕女,要有仔送終嘅的傳統思維下,香港都出現過幾次嬰兒潮,逐漸令人口過剩。所以係七十年代就出左「兩個就夠晒數」計劃,減輕人口激增,但資源不足嘅問題。筆者心諗:乜原來香港要去七十年代先興生育計劃,咁以前又唔避孕,又死都要生慈姑椗,地球咪好很多人!好在,以前有唔少病都仲係醫唔到,令到唔少人其實生存唔到咁耐(真係死得好快),如果唔係,我諗我地住緊納米樓都唔掂。

 

其實歷史經驗話我地知,地球上有唔少人類都係冇「被計劃」嘅情況下誕生,搞到每個家庭都有唔少額外負擔,住又唔夠住,飯都唔夠分,令小朋友嘅童年都特別辛苦。可惜唔少傳統派人士無視呢種家庭狀況,仍然鼓勵「自然家庭計劃」,咁即係得一個字:中左就生。

唔知你係有被計劃地出世呀?定係冇被計劃,係聖誕節,情人節,復活節,定係某次呀爸呀媽去旅行嘅「意外收獲」?或者你夠唔夠膽問呀爸呀媽,點解你會係個個月份出世呢?不如留個言,一齊討論下!

撰文:男校女主筆